Revelation of John 20

E Susun Po Oraß Hat To Teß Non Pa Nohnoh Po 1,000 Kirismas

1Ivëh, köß ep in a ankeroß to kunah taneß maß pa vöön va kin. Eß to öt non a kiß va pa koveß ruruvun hikto noton vaßpeh me o urih eh. 2Eß to öt töön non a kuruß apuh, a kuruß vatamoaan voh vëh. A kuruß vëh, e susun po oraß hat, a teß to vakihat me a rora, me eß to vavateen non sih a ma napan pa hat. A ankeroß to noh töön poan po uris eh, keß teß antoen non po 1,000 kirismas. 3A ankeroß to vi kunah poan manuh pa koveß ruruvun hikto noton, ko panih pip en na peß po hopaß, suk a ö neß se nat non tavus hah maß pa piuk vatëh a ma napan. Eß se teß antoen non po 1,000 kirismas, ka ankeroß pah vatvus hah poan, keß vavih ro vah non pa ma siß poen.

4Eöß to ep me a ma ö ihihoß pa teß sunön no a ma napan to ihoß ne. A ma teß poë varih no a ma meh teß to moes kurus voh a ma koßkoeere, kee mët vahik ee. A ma meh to moes kurus a ma koßkoeere, suk ee to vaman voh ne e Ieesuß, ko vatvus voh ne a ëhnaneah, ko öt vakis voh ne a soe pe Sosoenën. Ee me to hikta vasunön voh ne a tah poa vaßpeh me a tah nößnës va peß, pare hikta kon voh manih pa naire me pa koreere o vëknöm peß. Ee to kon hah o toßtoß, ko ihoß ne pa ma ö ihihoß pa teß sunön. E Sosoenën to heß raoe a kiu va pa kiiki a ma taateß pa napan. Pare teß va ne manih po teß sunön vaßpeh me e Kristo po 1,000 kirismas. 5A ma meh napan varih to mët voh to hikta kon voh o toßtoß, ee se anoeh ne o 1,000 kirismas se oah voh. A tah vëh, eß a sun momoaan taneß hah pa mët. 6A ma napan varih to sun taneß hah momoaan pa mët, ee se vaeö rakah. Suk ataeah, ee a ma teß vivihan pe Sosoenën, keß hikta se vateß non raoe po vahutët, ko vahoß me raoe pa koveß suraß ororan vëh to ësës tamoaan non po vös salpaß, ka tah vëh, eß a vapöök mët. Ee se teß va ne manih pa ma teß ësës heß pe Sosoenën me e Kristo. Ee se teß ne a ma teß sunön vaßpeh me e Kristo komön 1,000 kirismas.

E Susun Po Oraß Hat To Kon Vahat

7O 1,000 kirismas to oah ee, ka ankeroß se peret ken pe susun po oraß hat pa koveß ruruvun hikto noton, keß tavus këh en maß pa nohnoh. 8Eß se tavus maß, pareß taneo en pa piuk a ma napan varih to teß ne maß po taanaß noton in o oeh, o vuteß va pe Gog, me Megok. E susun po oraß hat se ununun raoe, pareß kunkuin o vapus ko vapus me e Sosoenën. Ee to teß peo va ne manih po kösan vëh sinten tahiß. 9Ee se nö po oeh avoes, pare tapön a vöön no a ma napan pe Sosoenën to teß ne, a vöön pamëh ne Sosoenën to iu oah rakah non. Ivëhkëk, o suraß se taneß maß pa vöön va kin ko pah ës vahik en pee. 10E susun po oraß hat to piuk voh raoe, ivëh, ke Sosoenën vi kunah en peß manuh pa koveß suraß ororan to ësës tamoaan non po vös salpaß, pa ö no a tah poa, me a teß vanënën soe pikpiuk to teß tamoaan ne. Ee se kakamis tamoaan rakah e ne pa popoen me pa potan.

O Kiiki Apuh To Tavus En

11Eöß to ep me a ö ihihoß apuh kakaare pa teß sunön, ko ep me eöß pa pah Teß to ihoß non nën. O oeh me akis to ro këh ee peß, ko hikta teß hah ne. 12Köß ep in a nap mët hikto ëhnan, me a napan akuk to teß ne, ee to sun ne pa matan a ö ihihoß pa teß sunön. Ka teß sunön taß, ka ma ankeroß kakap ee pa ma puk pa ep pa ma tah to kiun suk non a ma tah no a napan poë varih to nonok voh ne, pare pah kap pet ee po puk vëh, no a ëhnan a napan varih se teß toßtoß vaßpeh me ne e Sosoenën. Ke Sosoenën kiiki a ma napan pa ma taateß voh pee, me a ma tah nee to nonok voh ne, pa ö neß to kiun va non manih po puk. 13A ma napan varih to mët voh tahiß, to nö, pare sun po vahutët pe Sosoenën. A napan varih to mët moaan voh ka apeere nö manuh pa vöön pa nap mët, me o teß varih to teß ne pa mët, to nö, ee me to sun po vahutët pe Sosoenën. Ke Sosoenën, a tökiiki vahutët, to kiiki papaeh raoe, to onöt non a ma taateß nee to nok voh. 14Ke Sosoenën vahik en pa vöön pa nap mët, me a mët. A poa tah poë varih to hikta teß hah ne, suk e Sosoenën to vi en na pee pon manuh pa koveß suraß ororan vëh to ësës tamoaan non po vös salpaß, ka tah vëh, eß a vapöök mët. Ka napan kurus varih no a ëhnëëre to hikta teß non manih po Puk va po Toßtoß, ee se vi kunah na raoe manuh pa koveß suraß ororan apuh to ësës tamoaan non po vös salpaß.

15

O Oeh Me A Akis Voon To Tavus